बुटवल उपमहानगरपालिकाले आज ६७ औँ स्थापना दिवस मनाउँदै
बुटवल । बुटवल उपमहानगरपालिकाले आज आफ्नो ६७ औँ स्थापना दिवस मनाउँदैछ । यस वर्ष प्रतिनिधिसभा निर्वाचनको आचारसंहिता लागू भएका कारण सामान्य र संक्षिप्त रूपमा स्थापना दिवस मनाइने भएको हो ।
उपमहानगरपालिकाले स्थापना दिवसको अवसरमा सप्ताहव्यापी रूपमा सञ्चालन गरिएका विभिन्न कार्यक्रम भने सफलतापूर्वक सम्पन्न गरेको जनाएको छ ।
बुटवल उपमहानगरपालिकाका नगर प्रमुख खेलराज पाण्डेयले निर्वाचन आचारसंहिताका कारण यस वर्ष स्थापना दिवसलाई संक्षिप्त तर सन्देशमूलक ढंगले मनाइने जानकारी दिनुभयो । पाण्डेले विगत वर्षहरूमा हासिल गरिएका प्रमुख उपलब्धिहरू स्थापना दिवसकै अवसरमा सार्वजनिक गरिनेपनि बताउनुभयो ।
उहाँले “उज्यालो बुटवल” अभियान अन्तर्गत नगरका मुख्य चोक तथा सडक क्षेत्रमा एक सातासम्मसरसफाइ कार्यक्रम सञ्चालन गरिएको बताउनुभयो ।
उक्त अभियानले शहरलाई सफा, सुन्दर र व्यवस्थित बनाउने दीर्घकालीन लक्ष्यलाई थप सुदृढ बनाएको उहाँको भनाइ छ । साथै, उज्यालो शहर निर्माण अभियान अन्तर्गत सरसफाइ, हाईमास्ट बत्ती जडान तथा विभिन्न पूर्वाधार विकासका कामहरू प्रभावकारी रूपमा अघि बढाइएको पनि उहाँले बताउनुभयो ।
नगर प्रमुख पाण्डेयले बुटवल ऐतिहासिक, सांस्कृतिक तथा सभ्यताको महत्वपूर्ण केन्द्र भएको उल्लेख गर्दै जितगढी किल्ला र पुरानो बटौली क्षेत्रका ऐतिहासिक सम्पदाको संरक्षणलाई प्राथमिकतामा राखिएको बताउनुभयो ।
बुटवललाई शिक्षा, स्वास्थ्य र खेलकुदको केन्द्रका रूपमा विकास गर्ने लक्ष्यसहित योजनाबद्ध रूपमा काम भइरहेको बताउनुभयो ।
त्यसैगरी, उपप्रमुख सावित्रा आर्यालले शिक्षा, स्वास्थ्य, रोजगारी, महिला उद्यमशीलता तथा महिलासशक्तीकरणलाई नगरको प्रमुख प्राथमिकतामा राखिएको बताउनुभयो ।
महिलाहरूको आर्थिक सशक्तीकरण बिना समग्र नगर विकास सम्भव नहुने उल्लेख गर्दै उहाँले महिला लक्षित कार्यक्रमहरूलाई थप प्रभावकारी बनाइने जानकारी दिनुभयो । साथै, शिक्षाको गुणस्तर सुधार तथा पहुँच विस्तारका लागि विशेष कार्यक्रम सञ्चालन गरिएको पनि उहाँले बताउनुभयो ।
उपमहानगरपालिकाले स्थापना दिवसलाई उपलब्धि मूलक, सन्देशमूलक र विकासमुखी कार्यक्रम मार्फत मनाउँदै बुटवललाई राष्ट्रिय तथा अन्तर्राष्ट्रिय स्तरमा स्थापित नगरका रूपमा पहिचान दिलाउने लक्ष्य लिएको जनाएको छ।
यो पनि पढ्नुहोस्
