तिलोत्तमाका मेयर खाँणको पहिलो निर्णय : बालबालिकाको दिवा खाजामा १० रुपैयाँ थप गर्ने

बुटवल । तिलोत्तमा नगरपालिकाका प्रमुख रामकृष्ण खाँणले शुक्रबार पद तथा गोपनीयताको सपथ लिनुभएको छ । मुख्य निर्वाचन अधिकृत धनसिंह महराले नवनिर्वाचित मेयर खाँणलाई पद तथा गोपनीयताको शपथ खवाउनु भएको थियो । सोही अवसरमा कोटहीमाई गाउँपालिकाका अध्यक्ष बालकृष्ण त्रिपाठीले पनि मुख्य निर्वाचन अधिकृत धनसिंह महराबाट पद तथा गोपनीयताको शपथ लिनु भएको थियो । शपथ ग्रहण कार्यक्रममा मुख्य निर्वाचन अधिकृत महरा, प्रमुख जिल्ला अधिकारी ऋषिराम तिवारीले बधाइ तथा शुभकामना दिँदै जनचाहाना अनुरुप काम गरेर अब्बल भूमिका निर्वाह गर्न आग्रह गर्नुभएको थियो ।

शासक होइन, सेवक भएर काम गर्छुः खाँण

शुक्रबारै पदभार ग्रहण गर्दै तिलोत्तमाका मेयर खाँणले जनताको सेवक भएर काम गर्ने प्रतिबद्धता ब्यक्त गर्नुभएको थियो । तिलोत्तमालाई भ्रष्टाचारमुक्त र सुशासनयुक्त नगर बनाउने प्रतिबद्धता गर्दै खांडले शासकको रुपमा नभइ जनताको सेवक बनेर नगरको विकासमा लाग्ने बताउनुभयो। नगरपालिकाबाट प्रदान गरिने सेवा सुविधालाई छिटो छरितो र पारदर्शी बनाउँदै सुशासन कायम गर्ने उहाँले बताउनुभयो । सहमति, सहकार्य र एकतालाई मुल मन्त्र बनाउने र सबै दलहरुलाई समेटेर अगाडि बढ्ने खाँणले बताउनुभयो।

नगरका सबै वडा, टोलरबस्तीको समानुपातिक विकासका लागि अध्ययन गरी विज्ञ समूह, राजनीतिक दल तथा आम नगरबासीको सुझाव सहयोग र सहकार्यबाटै अगाडि बढ्ने खांडले बताउनुभयो। शिक्षा, स्वास्थ्य, खानेपानी, सडक, फोहोर व्यवस्थापन, सिँचाइ, मल, विउविजन जस्ता विकासका आधारभूत पक्षलाई जोड दिइने बताउनुभयो। नगरबासीको हितमा संचालित योजनाहरुको निरन्तरता संगै नगरका जनताको हित र आवश्यकता अनुरुपका नयाँ र महत्वपूर्ण योजना ल्याउने बताउनुभयो।

तिलोत्तमा कृषि, औधोगिक र पर्यटकीय सम्भावना बोकेको नगर भएकाले सहमति सहकार्य र एकताबाटै विकास र समृद्धिको यात्रामा यसलाई रुपान्तरण गरिनेमा जोड दिनुभयो। मेयर खाँणले उपमेयर जगेश्वरदेवी चौधरी र नवनिर्वाचित वडाध्यक्ष तथा सदस्यहरुलाई शपथ खुवाउन ुभएको थियो । पदभार ग्रहणका क्रममा खाँणले नगरपालिका कार्यालय परिषरमा रुद्राक्ष र तराइमा फल्ने स्याउको बिरुवा रोपेर नगरलाई हरियाली नगर बनाउने पनि बताउनुभयो। सोही कार्यक्रमलाई सम्बोधन गर्दै मेयर खाँणले निर्वाचित सबै जनप्रतिनिधिहरुलाई जनताको सेवक भएर नगरको विकासमा लाग्न आग्रह गर्नुभयो ।

कार्यक्रममा निर्वतमान नगरप्रमुख बासुदेव घिमिरेले बधाइ सुभकामना दिँदै नगर र नगरबासीको हितकालागि आफ्नो रचनात्मक सहयोग रहने प्रतिवद्धता ब्यक्त गर्नुभयो ।

बालबालिकाको खाजा खर्चमा नगरपालिकाले १० रुपैयाँ दिने

तिलोत्तमा नगरपालिकाका प्रमुख रामकृष्ण खाँणले शुक्रबार पदभार ग्रहण गर्दै देशको भविष्यसंग जोडिएका बालबालिकाको शिक्षा, स्वास्थ्य र पोषणमा विशेष ध्यान दिँदै दिवा खाजा वापतको रकम वृद्धि गर्ने निर्णय गर्नुभएको छ । बालबालिकाको स्वास्थ्य र पोषणको स्थितिमा सुधार ल्याइ शिक्षाको गुणस्तर वृद्धिका लागि ८ कक्षासम्म अध्ययन गर्ने बालबालिकाको लागि दिवा खाजामा १० रुपैयाँ नगरपालिकाले प्रदान गर्ने निर्णयमा हस्ताक्षर गर्दै नगरप्रमुख खाँणले कार्यकाल सुरु गर्नुभएको हो । सामुदायिक विद्यालयमा अध्ययनरत बालबालिकालाई दिवा खाजा वापत सरकारले हालप्रति विद्यार्थी १५ रुपैयाँ प्रदान गर्दछ ।

तिलोत्तमा नगरपालिकाले थप १० रुपैयाँ उपलब्ध गराउने भएपछि ८ कक्षासम्म अध्ययन गर्ने बालबालिकाले अब दैनिक २५ रुपैयाँ बराबरको दिवा खाजा प्राप्त गर्नेछन् । यो निर्णयले सामुदायिक विद्यालयमा अध्ययन गर्ने बालबालिकाको संख्या बढ्नुका साथै ती बालबालिकाको स्वास्थ्य र पोषणको स्थितीमा पनि सुधार आउने विश्वास नगरप्रमुख खाँणले व्यक्त गर्नुभयो।

‘हाम्रा बालबालिकाको आजसंग देशको भविष्य जोडिएको छ। उनीहरुलाई गुणस्तरीय शिक्षा संगै कुपोषणबाट बचाउँदै स्वस्थ राख्नु हाम्रो दायित्व हो। त्यसैले ८ कक्षासम्म अध्ययन गर्ने बालबालिकाको खाजा खर्चका लागि सरकारले हाल दिँदै आएको १५ रुपैयाँमा नगरपालिकाले १० रुपैयाँ थपेर २५ रुपैयाँ पुर्याउने निर्णय गरेका छौं,’ नगरप्रमुख खाँणले भन्नुभयो।